ماشافت عيني اجمل منك
جزء 2 من 9
فصل1
بارت1🌹
وسط رمال الصحاري و التضاريس القاسيه قريه بعيده كل البعد عن المدينه والحضاره..وبحي من احيائها البسيطه والشعبيه وبالضبط في بيت شعبي بسيط اقل مايقال عنه متهالك وقديم..
كانت امرأه كبيره فالسن جالسه بالحوش تسبح وتهلل وقدامها منضده صغيره عليها كاسه الشاهي تشرب منها بين فتره وفتره..ماغيرها ام زهير والي كان اسمها جواهر،كانت اسم على مسمى جوهره بطيبه قلبها وصفاء روحها وبالرغم من كبر سنها الا انو الي يشوفها يدرك انها كانت جميله في شبابها وخلف هذه التجاعيد جمال فاتن..
طلعت بنت عشرينيه للحوش وبيدها صطل المويه شافت جدتها جالسه سرحانه وتستغفر..راحت البنت سقت النباتات والورود المزروعه بعدها رجعت جلست مع جدتها..
ناظرتها الجده:شفيك يابنتي؟
قمر تنهدت:مشغول بالي مع ليلى المسكينه اخدت طق لين تفلت العافيه
الجده وهي تتنهد بضيق:الا وينه صقر يوديني للمسشفى قلبي محروق عليها
شهقت قمر بخوف:يمه لا يسمعك قسم بالله بيحرق البيت واحنا فيه هو حالف مانروح لها
الجده بعصبيه:وليه ان شاء الله بعدما طقها لين تكسرت ماترك فيها عظم سليم يجي الحين يحرمنا من شوفتها لا والله ماحزر
قمر بتوتر وبصوت منخفض:لا تصارخي اخاف يسمعك
الجده وهي تمسح على وجهها بضيق:اااه يا ليلى وش سويتي بحالك يابنتي ليه تعاندي راسها يابس وماتسمع الكلام والي براسها تسويه(ناظرتها) وينها غزال ؟
قمر:بغرفتنا المسكينه حالتها حاله ماوقفت بكا على اختها
الجده قامت وبصرامه:نادي اي احد من العيال يوديني لليلى بسرعه يلا
....بصرامه:مافيه روحه لعندها
تغطت قمر بسرعه عنه بعدما سمعت صوته وعرفته على طول ماغيره صقر كابوسهم ومرعبهم..
لفت الجده له وقالت بحده:هذي حفيدتي وامانه حيدر عندي مايصير كذا يا صقر ادري انها غلطت وكثير بعد بس انت بعد زودتها معها وش استفدت الحين لما دخلتها المستشفى هاه ؟؟ ليلى راسها يابس وانت اكثر منها مايفيد معها ذا الاسلوب يا ولدي
صقر بسخريه:لا والله يعني الاقيها تدخن وتبيني اصفقلها واعطيها ورده؟ (وبعصبيه) لو انعادت اللحظه مارح اتردد ابد و الود ودي انحرها واشرب من دمها والي صار فيها قليل بحق فعلتها سودت وجيهنا
الجده رفعت صوتها وبتهديد:وقسم برب الكعبه لو تعيدها مره ثانيه وترفع يدك عليها او على اي وحده من البنات لا انا جدتك ولا انت حفيدي انقلع من وجهي مابغى اشوفك
شد صقر على قبضه يده بقهر وطلع من البيت بعدما زرع الباب وراه..
انهارت الجده على الكرسي بتعب وهي ترجف انتبهت لها قمر وراحت لها بخوف وقلق..
قمر بخوف:يمه انتي بخير؟ شفيك ضغطك ارتفع ولا ايش تبيني اجيبلك الدوا؟
الجده اشرت لها بلا وقالت بصوت تعبان:بتذبحوني اخرتي رح تكون على ايدكم
قمر والدموع بعيونها باست راس جدتها:يمه لا تقولي كذا تدرين قد ايش نحبك ونغليك ماعندنا احد غيركم انتي وجدي
ابتسمت الجده بتعب وتنهدت:راسه يابس ذا الصقر زي ابوه الله يرحمه..مارح يوديني للمستشفى اتطمن عليها
قمر بضيق:شرايك ادق على تميم يمكن يقدر يودينا
الجده بلهفه:ايه ايه دقي عليه يمكن يوافق
دقت قمر بسرعه وحطت الجوال على اذنها لحظات ورد تميم:الو وش تبين يا قمر؟
قمر بصوت منخفض:اسمع جدتي تبغى تروح تطمن على ليلى تكفى شوف شلون تاخد السياره ووصلنا
تميم بصوت هامس اكثر وبعصبيه:مجانين انتوا ولا ايش عشان يذبحني صقر وهو حالف علينا الي يروح لها او اذا وداكم واحد منا بينحرنا عادي عاد انتي تدرين قد ايش هو مجنون وبيسويها
قمر بقهر:مالت عليكم وعليه(وسكرت الخط بوجهه) يمه رفض قال صقر موصيهم لاحد يودينا لها
الجده بضيق:اااخ بس ان شاء الله ماتكون محتاجه شي هناك الله اعلم بحالها اذا تحسنت
قمر:ان شاء الله تكون تحسنت يارب مو ناقصنا وجع ومشاكل
نروح لغير مكان بس فنفس البيت..
ناظرتها بعصبيه:خلص غزال وترتني من الصبح ماوقفت بكا ارحمي عيونك شوي
غزال وهي تبكي بقوه وقهر:شلون مابكي شلون والزفت صقر كسر اختي تكسير حرام عليه حرااام صحيح هي غلطت بس مايصير يرفع ايده عليها فالبدايه طقها هي بعدين رح يجي الوقت وناخد كف منه!!!
طيف وهي تمسح على وجهها بضيق ورايحه جايه بالغرفه:وش نسوي طيب هذا صقر وحش البيت
غزال وهي تمسح دموعها بقهر على اختها:غوريلا ووحش بنفس الوقت
سديم كانت تناظر من الشباك لما ركب السياره وراح بأقصى سرعه:مجنون ذا الآدمي
غزال ناظرتها:مجنون وغوريلا ووحش كل شي مو حلو فيه
دخلت نور وسمعت آخر كلامها:مين ذا؟
غزال وهي مكشره:اخوك ليش فيه احد غيره
نور بعصبيه:ياهووو سلامات كل شوي تنافخين فهمنا انه غلط بس شكلك نسيتي وش سوت اختك المجنونه هو مسكها تدخن لا ومن سجايره بعد يعني وش متوقعه يسوي يزغرط لها مثلا
غزال بعصبيه:ماقلت انها مو غلطانه وكمان هو فهم السالفه غلط
نور:وشو الي فهم غلط هو قال شافها بعيونه
سديم تغير السالفه بعدما احتد الجو:خلاص انتي وهي خلونا نلاقي حل
طيف جلست على طرف السرير:انا اقول مانسوي شي من الاحسن ننتظر لين يخف غضبه يمكن يودينا لعندها
غزال بعصبيه:انتظر حضرت جنابه عشان يهدا هذا الي كان ناقصني(ناظرت نور) وانتي حاولي تقنعي اخوك
نور شهقت:مابي اموت اذا تبغين تشوفين اختك كلميه مالي علاقه(وطلعت)
غزال بقهر:روحه بلا رده
سديم:شفيكم نشبتوا فبعض
غزال بعصبيه وهي تمسح دموعها:سديم بالله عليك اسكتي مو فاضيه لك انا
طيف:وش بتسوين طيب ؟
غزال وهي تناظر للفراغ:رح يشوف وش بقدر اسوي..
نروح بعيد عن بيت ابو زهير وبمستشفى الديره..
مستلقيه على سريرها تناظر للسقف بشرود وسرحان،كل شي فيها يعورها بسببه تحس جسمها مكسر تكسير ولولا الادويه الي خففت المها ماكانت رح توقف صراخ من الوجع،شدت على يدها بقهر ونزلت دمعه حارقه من عينها،تمنت لو كانوا اهلها عايشين،لو كان ابوها على قيد الحياه ماكان سمح له يلمسها حتى او يجرحها بكلماته،صحيح هي غلطت بعنادها وتمردها بس حتى هو بالغ برده فعله،ناظرت لحالتها بقهر،رجلها اليمين فيها رضوض وايدها اليسار فيها كسر بالمرفق،وجهها كله جروح وكدمات وراسها عليه شاش ابيض من الضرب الي اكلته من صقر،تنفست بقهر وحقد عليه وهي حالفه ماتتركه بحاله،هي دايما كذا مستحيل تهدا نارها تحرق كل شي حولها..وهذي هي ليلى بطلتنا
⏳️فلاش باك⏳️
قبل 6 ساعات ببيت ابو زهير..
غزال بخوف وهي واقفه عند باب غرفه صقر:ليلى يا بقره بسرعه يلا قبل لا يمسكنا
كانت ليلى بغرفه صقر تدور على بكت سجايره والولاعه بيدها هم بتحدي ولازم تسويه هي و طيف عشان يفوزون على البنات..هي مجنونه ومتمرده و ممكن تسوي اي شي بس عشان ماتخسر..
ليلى بإستعجال وهي تدور:غزال اسكتي يرحم والدينك
طيف بحماس:سيبك منها ليلى دوري هناك
غزال شوي وتبكي من الخوف كانت تحرسهم منتبهه اذا جا صقر عشان يهربون:قسم بالله لو يشوفنا بينحرنا ثلاثتنا
ليلى لقته وصارخت بحماس:لقيته يا طيف
طيف اخدت سجاره والولاعه من يد ليلى وولعتها حطتها بفمها واستنشقت،كشرت وتغيرت ملامح وجهها ورمت السجاره عالارض بقرف وهي تكح
غزال بتوتر:وش صار ليه صارت تكح؟ انا الحماره لأني جيت معكم
ليلى بسخريه:ماهقيتك يا طيف رقيقه وضعيفه كذا لا وكمان خسرتي التحدي
طيف بقرف:جربيه بعدين احكي
اخدت ليلى سجاره وولعتها حطتها بفمها واول ماستنشقت لفت لغزال بخرعه..
غزال بخوف:صقر جاي اطلعوا
طيف و ليلى بنفس الوقت:ايش؟؟
شاف صقر غزال وهي واقفه عند باب غرفته عقد حواجبه بإستغراب وراح صوبها اول ما وقف قدامها وفتح فمه عشان يتكلم الا وبدت تركض بسرعه،استغرب من حركتها رفع راسه وانصدم من المنظر،ليلى بنت عمه حاطه بفمها سجاره وتدخن؟؟ لا ومن ىسجايره بعد!!
صرخ صقر بعصبيه وبأعلى صوته:وش تسوين يا****
تركت ليلى السجاره بسرعه وبلعت ريقها بخوف:صقر انت مو فاهم شي
راح صقر لها اعطاها كف لف وجهها لف..
طيف بشهقه:وش سويت!!!
صقر ناظرها واعطاها كف هي بعد وصرخ بعصبيه:وش تسوون يا**** تدخنون؟؟ من متى بناتنا يدخنون هاه؟؟؟
صرخت ليلى بقهر وهي حاطه يدها على خدها:خلني اشرح لك طيب
ماهتم لها لأنه شاف كل شي بعيونه وسحب عقاله من على راسه وطاح فيها ضرب لين تفلت العافيه،اول ما شافت طيف حالته الهايجه هربت على طول تنادي احد يفكه من ليلى قبل لا تموت بين يدينه..
⏳️باك⏳️
همست ليلى بحقد وقهر:اذا ماندمتك يا صقر ماكون انا ليلى بنت حيدر..
وعلى آخر كلامها انفتح الباب ودخل صقر بدون مقدمات وجهه مايطمن ابد والعصبيه طالعه من عيونه..
رمت ليلى بسرعه الطرحه على راسها بعصبيه:سلامات داخل مدرعم كذا بدون احم او دستور
صقر طنشها وراح لها مسكها من فكها بقوه ورفعها شوي:ولا كلمه مابي اسمع صوتك مسويه حالك الشريفه وانتي خاربه الدنيا
ليلى بصراخ وانفعال:انا اشرف منك ومن الي خلفوك
اعطاها صقر كف وبحده:لا تجيبي طاري الاهل على لسانك الوصخ فاهمه ولا لاء!!!! ويكون بعلمك اول شخص رح يتقدملك بنوافق عليه يمكن تعقلين اذا تزوجتي
حطت ليلى يدها السليمه على خدها الي يحرقها من قوه الكف تحس بطنين بأذنها وبالرغم من التعب والالم كابرت ومثلت القوه،ما اهتمت لآخر كلامه لأنها تدري مايقدر يسوي شي،لفت له وبعيونها قوه ونار متقده:اقسم بالله لو رفعت يدك مره ثانيه علي لا تلوم الا نفسك يا ولد العم
صقر وهو يصارخ بغضب جامح:ولك عين ووجه تهددين بعد تستهالين الي جاك
ليلى بسخريه وقهر:انت فاهم كل شي غلط ماسألتني حتى طقيتني على طول
صقر شوي ويجن:وش تبيني اسألك وانا شفت كل شي بعيوني
ليلى بعصبيه:كنا بتحدي يا غبي البنات تحدوني انا وطيف اذا دخنا من سجايرك بنفوز واذا ماسويناها بخسر وانت تدري اكثر شي اكرهه فذي الحياه الخساره (وبسخريه) بس ما شاء الله على حظي شوي وخسرت حياتي بسببك
صقر وهو يصارخ بجنون مو مستوعب وش قالت:مجانين انتوا وش ذي التحديات **** اقسم بالله انكم مجانين وبنات قليلات حيا بس هيييين اذا ماربيتكم من جديد ماكون انا صقر
ليلى وهي تأشر على حالها وبنبره ساخره: وش باقي ماسويته ما شاء الله عليك عندك حديده مو يد
مسك صقر ضحكته بالقوه بالرغم من حالتها الي هي فيها الا انو لسانها وش طوله..استغفر وقام يطلع بس وقفه صوتها..
ليلى:هييء انت على وين؟
صقر لف لها وبعصبيه:خييير؟
ليلى وهي تناظره من فوق لتحت:نسيت شي
صقر بحده:وش نسيت؟
ليلى بغباء:نسيت تعتذر
صقر وهو يمسح على وجهه ويستغفر لا يقوم يذبحها وطلع بسرعه من الغرفه قبل لايرتكب فيها جريمه وتركها تضحك بقوه بعدما نجحت في استفزازه..
دخلت الممرضه:السلام عليكم
ابتسمت ليلى بمكر تبي تكسر الملل معها:وعليكم السلام كيفك يا حلوه
الممرضه ابتسمت:الحمد الله تمام وانتي
ليلى بسخريه:شوفت عينك مكسره تكسير سيبك مني الا وش اسمك؟
الممرضه:اسمي مهره بس ليه تسألين؟
ليلى بإبتسامه مزيفه:والنعم يا مهره صراحه دخلتي قلبي وحبيت اخطبك لولد عمي توه طلع اذا انتبهتي
الممرضه استحت وهي خاقه عليه:صدق؟
ليلى وهي ماسكه ضحكتها:ايه ايه اعطيني رقم امك لاهنتي
الممرضه ماصدقت على الله واعطتها رقم امها وطلعت بسرعه يقال مستحيه..
واول ماطلعت انطلقت ضحكات ليلى:يا حليلها صدقت المسكينه..
ببيت الجد ابو زهير..
بالمطبخ كانوا البنات يجهزون الغذا والسفره قبل لا يرجعون الشباب من المحل..
نور وهي تذوق الاكل:سديم الرز ناقصه ملح زيدي شوي
سديم:لا اخاف اكثر بعدين جدتي معها ضغط مو زين لها الملح
نور:ايه صح
دخلت قمر وشافت طيف سرحانه:شفيها بنت عصام سرحانه
طيف ناظرتها:بالي مشغول مع ليلى
قمر:الا صح متى قالوا تطلع؟
طيف:اظن بعد يومين
قمر هزت راسها بطيب ولفت للبنات تشوفهم يطبخون بكل همه وضمير:عاشوا طباخاتنا
نور برفعه حاجب:لو كان فيك خير شوي تعالي وساعديني مو تمدحين من بعيد
قمر ابتسمت:اكيد ليش لا وش تبوني اساعدكم فيه؟
سديم وهي تأشر على السلطه:قطعيها وجهزيها الكل يدري مافيه الذ من سلطه قمر
قمر ضحكت بهدوء وشمرت على اكمامها وراحت تقطع السلطه..
سمعت طيف جوال جدتها ابو كشاف يرن بالمجلس وراحت تشوف مين المتصل وصرخت بفرح:ذياب!! ذياب يتصل!!
سمعتها جدتها وراحت لها والسعاده واضحه عليها:ردي عليه بسرعه
ردت طيف وقالت بشوق:هلا والله بأبو الذيب حيا الله هالصوت كيفك ياسندي عساك طيب وبخير؟؟ وجدي شلونه هناك مع العلاج؟
رد عليها ذياب وهو مبتسم بعدما سمع صوت اخته:الحمد الله بخير وجدي تحسن عن قبل و انتي شلونك وكيفها جدتي والباقي؟
طيف وهي تناظر جدتها المبتسمه:بخير بخير دامني سمعت صوتك كلنا بخير الحمد الله بس اشتقنا لك متى ترجع؟
ذياب:ابشرك باقي كم يوم بس وانزل الديره اخدت شهر اجازه من الدوام
طيف بسعاده:احلف!!!
ضحك ذياب بحماس:والله الا وينها جدتي ابغى اكلمها اشتقت لها
طيف:هنا هنا
واعطت جدتها الجوال وراحت تبشر البنات انو ذياب راجع..
طيف بحماس:بنااات عندي خبر بمليون ريال
لفو لها:وش فيه؟
طيف بسعاده وهي تناظر سديم:ذياب راجع قال اخد شهر من الدوام وبعد كم يوم ينزل الديره
شهقت سديم بفرح:احلفي يا طيف
طيف بفرح:والله
سديم والدموع متجمعه بعيونها:اشتقت له مره لساته ماسكر الخط صح؟
طيف:ايه يكلم جدتي
سديم وهي طالعه من المطبخ طيران:بروح اكلمه انا بعد حبيبي اخوي..(وطلعت)
نور ابتسمت وهي تناظر طيف الي كانت حرفيا طايره من الفرحه:زمان عن ذياب يارب يجيب لنا هدايا
طيف ضحكت:وانتي هذا الي هامك
نور ضحكت:تعودنا كل مره يجيب لنا شي
طيف ابتسمت وماقالت شي وتوها تنتبه لقمر الساكته والسرحانه..بعدها استوعبت طيف وتذكرت..
راحت طيف لها وبإبتسامه خبيثه:بالك مع مين حلوه؟
صحت قمر من سرحانها ونزلت راسها مستحيه وقلبها يدق بقوه من اول ماجبوا طاريه:طيف حلي عني
طيف وهي تضحك بإستفزاز:روحي كلميه دام بالك مشغول مع ابو الذيب
قمر وهي تكمل تقطيع السلطه بدون لا تناظرها وهي مستحيه:بنت عيب وش بيقول عني
نور ضحكت:يا خبله تراه زوجك على سنه الله ورسوله وشو الي عيب
قمر ناظرتها:خطيبي مو زوجي باقي ماسوينا العرس
نور ضحكت على خجلها:كلها واحد
طيف:قولي الصدق ماشتقتي له
قمر قامت مستحيه وطلعت من المطبخ بسرعه قبل لا ينتبهون لوجهها الي قلب طماطم من الخجل..
نور وهي ميته ضحك عليها:يا حليلها استحت
طيف:الله يعين ذياب عليها وعلى خجلها
نور ابتسمت:ايه والله..تصدقين احس ذياب راجع عشان يسوي العرس
طيف استوعبت:ايه والله شلون مافكرت فيها بس تصدقين بشتاق لقمره لاتزوجت هي الوحيده العاقله فينا
نور:لا يسمعك ابو الذيب مايحب احد يناديها بقمره الا هو
طيف بحالميه:يارب ارزقنا بحب زي ذا
وكملوا ضحك وهبال وطقطقه..
عند قمر الي كانت مع الزرع والورد الي بالحوش،ورود جوري غرسهم ذياب قبل لا يروح الرياض وقمر كل يوم تسقيهم وتهتم فيهم خاصه بعدما وصاها عليهم..ومن حب ذياب الشديد لوروده صارت تغار منهم كيف يحب وروده الحمراء اكثر منها وكلما تناظرهم تحسدهم على اهتمامه ،بس فنفس الوقت تشوفهم ذكرى منه وجزء لا يتجزأ منه ودام ذياب يحبهم فهي بعد تغليهم، كانت تكلمهم بصوت هامس تشكي لهم وجع قلبها وشوقها له كأنه يسمعها من خلال الورد..
سمعت صوت سديم وراها لفت وشافتها جايه صوبها وبيدها الجوال وعلى وجهها ابتسامه من الاذن للأذن..بلعت قمر ريقها بخجل ونزلت راسها..
سديم وهي تضحك بقوه عشان يسمعها ذياب من الجوال:يا حليل قمر مستحيه هذا وانا ماقلت شي ليه الحيا
قمر وهي تهوي على وجهها وبصوت يالله ينسمع:اعرف ليه جايه
سديم غمزت وهي تعطيها الجوال:ابو الذيب يبغاك
بلعت قمر ريقها واخدت الجوال وراحت سديم..حطت الجوال على اذنها وقالت بصوتها الناعم الهادي:الو..ذياب؟
جاها صوته الثقيل الي تعشقه:قلب وروح ذياب انتي
قمر ابتسمت بخجل:كيفك؟
ذياب تنهد تنهيده عاشق ولهان:عشقان ومشتاق يا قمره
استحت قمر من تنهيدته وماقالت شي..
ذياب عرف انها خجلت:وانتي ماشتقتي لي؟
قمر بصوت هامس:الا اشتقت لك
ذياب وهو مبتسم:ااااخ بس الود ودي انزل الحين للديره لولا الدوام بس هين كم يوم واكون عندك
قمر ابتسمت وقلبها يدق بقوه:متى راد؟
ذياب:آخر الاسبوع
قمر:حلو مابقى كثير يا دوب 3 ايام
ذياب:وش يصبرني عليك فذولي 3 ايام
قمر ابتسمت بخجل وهو كذا دايم يحب يخجلها ماردت عليه..
ذياب تذكر:قمره
قمر:هلا
ذياب ابتسم:تدرين ليه نازل الديره؟
قمر تفكر:لأنك اشتقت لنا؟
ذياب ضحك:ايه وغيرها؟
قمر:لا والله مادري
ذياب ابتسم بقوه والود وده يشوف رده فعلها:عشان عرسنا
فتحت قمر عيونها على وسعهم:ايش؟؟ يعني...
ضحك ذياب بقوه:ايه ايه عرسنا ذا الشهر ولا تقولي زي كل مره ماكملت تجهيز
قمر توترت وبتلعثم:بس..انت..انا و...
ذياب قاطعها:لا لا لا مابي اي اعذار المهم العرس ذا الشهر ولما تخلص اجازتي ارجع الرياض وانتي معي
قمر تنهدت بخجل:طيب خلاص الي تشوفه..
ذياب:لازم اسكر الحين يا قمره الذيب عندي شغل فمان الله
قمر ابتسمت على جملته المشهوره(قمره الذيب):فمان الكريم(وسكرت الخط)
تنهدت قمر بتوتر ومو مصدقه انها بعد كم اسبوع رح تنزف عروس لولد خالها ذياب حب طفولتها..هذي اللحظه كانت كافله انو تخلي دموعها تنزل من عيونها بس مو دموع حزن..دموع فرح وسعاده انها رح تجتمع معه تحت سقف بيت واحد وهو مارح يبخل عليها من حنانه ورح يهتم فيها زي مايهتم بوروده..ولانها تدري على قد حبها له ؛هو يعشق الارض الي تمشي عليها قمر..
بالليل..
ركن صقر سيارته قدام البيت ونزل منها وهو تعبان بعد يوم طويل وشاق فالمحل..دخل البيت وكان هادي زي كل مره بذا الوقت الكل نايم الا هو صاحي..راح المطبخ يدور على شي ياكله ويسد جوعه تالي الليل وبعدما اكل وخلص رتب المطبخ بهدوء وحرص عشان مايصحيهم..
طلع من المطبخ واتجه لغرفته والي كانت منعزله شوي عن باقي البيت بحكم انه مايحب الضجيج..فتح الباب ودخل شغل الاناره ولف لسريره الا ويفتح عيونه متفاجئ بها واقفه بعبايتها وعرفها بالرغم من انها متغطيه..
صقر بحده وهو يرص على اسنانه:انتي وش جابك هنا؟
غزال وهي تحاول تقوي حالها وماتخاف منه:اسمعني زين ابغاك توديني لليلى اتطمن عليها
صقر وهو يسكر عيونه وياخد نفس عميق يهدي حاله ماله حيل يتهاوش ويصارخ:مو فاضي لك يا غزال اطلعي يلا بسرعه
غزال بعناد جلست على طرف سريره وتكتفت:ماني بطالعه الا اذا وديتني لليلى
صقر بعصبيه:ماتفهمين الكلام قلتلك برا
خرعها صوته العالي وملامحه الحاده،بلعت ريقها وتجمعت الدموع بعيونها:تكفى صقر..
ناظر عيونها الي كانت تلمع بسبب الدموع،مارد عليها وراح للحمام (الله يكرمكم) مطنشها..
انقهرت غزال منه وزفرت بقهر وقررت تعانده وتزن فوق راسه لين يوافق..بعدها بلحظات سمعت صوت المويه وفهمت انه بيتروش..وقفت بتروح بعدها كنسلت الفكره ورجعت جلست معنده..
بعد ربع ساعه طلع صقر من الحمام وهو ينقط مويه شعره مبلول وطايح على وجهه ولابس فانيله ماسكه على عضلاته وشورت لين الركبه وماسك بيده المنشفه ينشف بها شعره مو منتبه لغزال الي تجمدت مكانها من الخوف والخجل..
رفع راسه صقر وطاحت عينه بعينها،مامرت ثانيه الا وتتغير ملامحه من اللين ويعقد حواجبه بعصبيه:لساتك هنا؟
وقفت غزال ولفت تصد عنه بسرعه وهي متوتره وخايفه:انت الي رفضت توديني بعدين استر حالك ليه طالع كذا
صقر اخد ثوبه ولبسه بسرعه وبحده:انا بغرفتي البس الي ابغاه انتي وش الي مجلسك عندي(وبعدما لبس) خلاص لفي
غزال لفت ببطئ وتنهدت براحه بعدما شافته لبس ثوبه،انتبهت لنظراته الحاده وبخوف قالت:اختي ابغى اشوفها ولا وش يجيبني عندك كني ميته عليك
ابتسم صقر بسخريه بعدها تنهد من حركاتها الطفوليه وهو يأشر لها بيده:تعالي..
غزال بصدمه:ايش؟
صقر بعصبيه:تعالي مارح اكلك
بلعت غزال ريقها وراحت له وهي منزله راسها:ليه تصارخ طيب لازم تعصب على كل شي يعني؟
ارتسمت على ملامح صقر شبه ابتسامه مانتبهت لها غزال وسرعان ماخفى ابتسامته اول ماصارت تناظره وبصرامه نطق:تعالي قربي..
قربت غزال اكثر وصارت واقفه قدامه وهي شوي ويطيح قلبها من الخوف تدقق بملامح صقر الحاده والي كانت كلها تنبض بالقسوه والرجوله..
صقر وهو يعطيها المنشفه وببرود:نشفي شعري
غزال بصدمه:سلامات خدامه عندك
صقر سحب المنشفه وكمل ينشف شعره:اجل دام كذا مافيه روحه
غزال انقهرت وقالت بتوتر وخجل:طيب طيب خلاص هات
اخدتها وبدت تنشف شعره بصعوبه بسبب فارق الطول..جلس صقر على طرف سريره عشان يسهل على غزال الوضع والي كانت شوي وتختفي من التوتر والخوف انتبهت لصقر الي كان مسكر عيونه ويتنفس بقوه..
خافت غزال وبعدت عنه بعدما خلصت:تعبان؟
فتح صقر عيونه وقال بصوت ثقيل وهو يغطي انفه بمنديل وعيونه الحاده ذبلت لين صارت ناعسه: وش ذي الريحه الخايسه
غزال تفشلت منه وشمت عباتها وكانت بالعكس ريحه جميله جدا:مو من عندي ريحتي حلوه
صقر عصب وبدا يصارخ:زين اطلعي يلا ماتستحين جالسه بغرفتي تبيني اكسر عظامك!!!
غزال بصدمه من تغير حاله:بإسم الله توك هادي وش زينك بعدين مو قلت بتوديني للمستشفى!!
صقر وهو يمسح على وجهه بضيق ويتنفس بقوه،اخد قاروره مويه خلصها دفعه وحده و غزال فاتحه فمها من الصدمه ماتدري وش فيه ووش قلب حاله..
صقر لف معطيها ظهره وبنبره صارمه:ماتشوفين الساعه كم خلص وقت الزياره بكرا اوديك والحين اذلفي يلا لا اشوفك تعتبين باب غرفتي مره ثانيه والا بحش رجولك حش..
طلعت غزال بسرعه قبل لا يذبحها تدري مافيه احد مزاجي زي صقر بس ماتوقعته لذي الدرجه..طنشت الموضوع و ماهتمت خاصه بعدما تطمنت بكره بيوديها وراحت لغرفتها المشتركه مع البنات عشان تنام..
بعدما طلعت غزال رمى صقر جسمه على السرير بتعب وهو يتنفس بقوه وريحه غزال لساتها مزروعه بأنفه وراسه..سكر عيونه وهمس:يارب صبرني...
مساحة إعلانية
تم اكتشاف أدوات المطور
لحماية المحتوى، يرجى إغلاق أدوات المطور للمتابعة في القراءة.
طباعة المحتوى غير مسموحة
محتوى محمي بحقوق الملكية - منصة يورانس
محتوى محمي بحقوق الملكية - منصة يورانس
التعليقات (0)
سجل دخول لتتمكن من التعليق
تسجيل الدخوللا توجد تعليقات بعد. كن أول من يعلق!